top of page

Algemene inligting

Saam skep ons 'n liefdevolle omgewing waarin elke maatjie kan groei!

​

By Junior Akademie glo ons dat elke kind uniek, kosbaar en spesiaal is. Ons kinders se welstand en ontwikkeling is ons eerste prioriteit. Daarom streef ons daarna om 'n veilige, liefdevolle en geborge omgewing te skep waarin elke maatjie met selfvertroue kan speel, ontdek, leer en groei.

​

Ons opvoedkundige benadering

 

Circle of Security

 

Die Circle of Security-benadering vorm 'n belangrike deel van ons opvoedingstyl. Ons glo dat kinders die beste ontwikkel wanneer hulle veilig, geliefd en geborge voel.

​

Ons moedig maatjies aan om hul omgewing met selfvertroue te verken, met die gerusstelling dat daar altyd 'n liefdevolle volwassene is na wie hulle kan terugkeer vir ondersteuning, vertroosting en leiding.

​

Duidelike grense, voorspelbare roetines en konsekwente begeleiding help kinders om veilig te voel en emosioneel te ontwikkel.

Meer inligting: Circle of Security International

 

Ons Speel-en-Leer-program

 

Junior Akademie volg die ELDA-riglyne en ons eie Speel-en-Leer-program, wat kinders se ontwikkeling deur spel en betekenisvolle ervarings ondersteun.

 

Weeklikse temas, klasuitkomste en ons oggend-, middag- en vakansieprogramme word op d6 Connect beskikbaar gestel.

Ons Bytjies tot Dolfyne geniet ook elke Vrydag 'n musiekles saam met oom Ronald.

​

Kommunikasie met ouers

 

Junior Akademie is 'n Afrikaanse kleuterskool en ons amptelike kommunikasie geskied in Afrikaans.

d6 Connect is ons amptelike kommunikasieplatform. Belangrike kennisgewings, weeklikse temas, programme, spesiale aktiwiteite en ander relevante inligting word hier gedeel.

 

Ons gebruik ook WhatsApp-groepe vir informele kommunikasie en om foto's en hoogtepunte van klasaktiwiteite met ouers te deel.

 

Ons juffrouens se aandag is gedurende skoolure by die kinders. Hulle is daarom eers vanaf 12:30 beskikbaar om op boodskappe te reageer.

Vir dringende sake gedurende skoolure kan ouers die kantoor kontak by 063 732 1166.

Ons vra vriendelik dat ouers ons personeel se privaatheid en gesinstyd ná skoolure respekteer.

 

Personeelafwesigheid

 

Wanneer ’n personeellid afwesig is, tref Junior Akademie die nodige reëlings om ’n geskikte aflos vir die dag te verseker.

Ons maak gebruik van gereelde aflospersoneel wat reeds met Junior Akademie se roetines en werkswyse vertroud is. Só verseker ons dat ons kleuters se daaglikse roetine met so min moontlike ontwrigting voortgaan en dat hulle steeds in ’n veilige, liefdevolle en bekende omgewing versorg word.

​

Ouerbetrokkenheid en vorderingsverslae

 

Ons glo dat goeie kommunikasie en samewerking tussen ouers en opvoeders noodsaaklik is vir elke kind se ontwikkeling.

 

Gedurende die eerste en derde kwartaal bied ons POP IN-geleenthede aan. Ouers kan dan 'n afspraak met hul kleuter se juffrou maak om hul ontwikkeling, vordering en algemene welstand te bespreek.

 

Formele vorderingsverslae word gedurende Junie en Desember elektronies per e-pos aan ouers gestuur.

 

Ouers is ook welkom om gedurende die jaar 'n afspraak te maak indien hulle enige vrae of bekommernisse oor hul kind se ontwikkeling het.

​

Skoolkalender en belangrike datums

 

Elke seisoen by Junior Akademie bring nuwe avonture, leergeleenthede en spesiale herinneringe!

 

Ons skoolkalender, temadae, konserte, oueraktiwiteite, vakansieprogramme en ander belangrike datums word deur d6 Connect gekommunikeer.

 

Ons moedig ouers aan om d6 Connect gereeld na te gaan vir die jongste inligting en enige veranderinge aan die program.

​

Gesondheid, higiëne en siek kleuters

Die gesondheid en veiligheid van elke maatjie en personeellid is vir ons baie belangrik.

Ons vra dat ouers kinders wat siek is, tuis hou om die verspreiding van aansteeklike siektes te beperk.

​

Belangrike gesondheidsriglyne:

  • Koors van 38 °C of hoër: 'n Kind mag eers terugkeer nadat hy of sy minstens 24 uur koorsvry is, sonder koorsverlagende medikasie.

  • Braking: Indien 'n kind meer as een keer binne 24 uur braak, moet die kind tuisbly totdat minstens twee maaltye sonder braking geëet is.

  • Diarree: Indien 'n kind meer as een keer binne 24 uur diarree het, mag die kind eers minstens 24 uur ná die laaste episode terugkeer.

  • Ooginfeksies, aansteeklike uitslag en kopluise: Die toepaslike behandeling en terugkeervereistes moet nagekom word.

 

Medikasie word slegs met skriftelike toestemming van die ouer toegedien.

Junior Akademie is 'n neutvrye sentrum. Geen neute of produkte wat neute bevat, mag skool toe gestuur word nie.

Ons volledige gesondheidsbeleid en die plakkaat “Ek moet by die huis bly wanneer…” is beskikbaar vir ouers om af te laai.

​

Vertroulikheid, omgee en wedersydse respek

By Junior Akademie glo ons dat elke kind met liefde, begrip en sensitiwiteit hanteer moet word.

 

Ons moedig ouers aan om belangrike veranderinge in hul kind se huislike omstandighede vertroulik met ons te deel. Dit kan byvoorbeeld 'n verhuising, die geboorte van 'n nuwe baba, 'n ouer wat vir werk weg is, siekte in die gesin of enige ander verandering wees wat 'n kind emosioneel kan beïnvloed.

​

Ons uitgangspunt is eenvoudig: “Handle with care.”

​

Wanneer ons weet wat in 'n maatjie se lewe gebeur, kan ons met groter begrip en deernis ondersteuning bied.

Ons respekteer elke gesin se privaatheid en hanteer persoonlike inligting met die nodige vertroulikheid.

​

Junior Akademie se personeel tree binne die toepaslike riglyne van die Kinderwet en ons interne beleide op. Besluite word altyd met die kinders se beste belang voor oë geneem, en waar 'n aangeleentheid 'n klas raak, sal die skool die nodige kommunikasie of ouervergadering reël.

​

By Junior Akademie werk ons hand aan hand met ouers om 'n veilige, gelukkige en liefdevolle omgewing vir elke klein hartjie te skep.

​

bottom of page